А что были межи нас в наше нелюбие воины и грабежи, или дани иманы, или где что взято и положеное, и тому погреб на обе стороне. А хто будет нятцев изниман, или на поруце дан, или к целованию приведен, а тех пустити без окупа и порука и целованье свести на обе стороне. А что будет у них взято, а то остало. А который мои люди, великого князя, приведены будут у тебя к целованию, и с тех ти целованье свести. А кого будем мы твоих людии к целованию привели, и нам с тех целование свести. А что мои наместници, и волостели, и посельски, и их тивуни ведали твою отчину и села боярский в твоей отчине, и о том нам оттослати по боярину, и они о том учинят исправу. Что будет взято право, то остало, а что будет взято криво, то отдати по исправе. Тако же, что ведали твои волостели, и поселскии, и их тивуни отчину княжу Костянтинову Дмитриевича, Шачебал да Ликургу, а то по тому ж отослати по боярину, да учинити исправа. Что будет взято право, то остало, а что будет взято криво, то отдати по исправе. А суженое, положеное, заемное, поручное, кабалное по исправе дата. А холопа, робу, должника, поручника, беглеца, татя, розбоиника по исправе выдати,

А на сем на всем, брате молодшии, князь Юрьи Дмитриевич, целуй ко мне крест, к своему брату стареишому, к великому князю Василью Васильевичю, и к твоему брату мо-лодшому, ко князю Андрею Дмитреевичю, и к нашему брату молодшему, ко князю Костянтину Дмитриевичю, по любви, в правду, без хитрости.

А писана на Москве, в лето шесть тысячное и девятьсотное тритцать шестое, индикта в 6, марта в 11 день.

2. Грамота князя Юрия Дмитриевича великому князю Василию Васильевичу

По благословенью отца нашего Фотиа, митрополита киевскаго и всия Руси, на сем, брате стариши, князь великий Василеи Васильевич, целуй ко мне крест, к своему брату молодшему, князю Юрью Дмитриевичю, и с моим братом молодшим, со князем с Ондреем Дмитриевичем, и с нашим братом молодшим, со князем Костянтином Дмитриевичем.

Быти вы со мною везде заодин, и до своего живота. А мне так же быти с вами везде заодин, и до своего живота. А добра вы мне хотети везде, во всем, где бы ни было. А што вы слышев о моем добре или о лисе от кого бы ни было, то вы мне поведати в правду, без примышленья. А мне так же вам добра хотети везде, во всем, где бы ни было. А што ми слышев о вашем добре или о лисе от кого бы ни было, и мне то вам поведати в правду, без примышленья. А кто будет тобе друг, то и мне друг. А кто будет тобе недруг, то и мне недруг. А не канчивати ми без вас ни с кем. А хотя буду с кем в целованье, и мне к нему целованье сложити. А вам так же не канчивати ни с кем без моего веданья.

А чим благословил отец твои, князь великий Василеи Дмитриевич, тобя своею вотчиною в Москве, и Коломною с волостми, и всим великим княженьем, и Новымгородом Нижним с волостми, и Муромом с волостми, и иными своими примыслы, или чим благословил твои дед, князь великий Дмитреи Иванович, а наш отец, мою братью молодшую, или што собе примыслили, или што собе примыслят, или што ся есмь ступил брату своему молодшему, князю Петру Дмитриевичю, Ликурги да Шачебала, и князь Петр Дмитриевич ступился брату нашему молодшему, князю Костянтину Дмитриевичю, или што ся есмь ступил брату своему молодшему, князю Костянтину Дмитриевичю, Звенигородских волостей, того ми всего под вами блюсти, а не обидети, ни вступатися, ни под вашими детми.

Так же ми вотчины княжих Володимеровых Ондреевича внучат блюсти, не обидети, ни вступатися.

А чим благословил дед твои, князь великий Дмитреи Иванович, а наш отец, меня, князя Юрья Дмитриевича, в Москве, и в станех в Московских, и Звенигородом с волостми, и Галичем с волостми и селы в великом княженьи, или што собе примыслю, того вы всего подо мною блюсти, а не обидети, ни вступатися, ни под моими детми.

А жити нам в своей вотчине в Москве и в вуделех по душевнои грамоте деда твоего, а нашего отца, великого князя Дмитриеве Ивановича, опрочь тех волостей, што ся есме ступили своему брату молодшему, князю Костянтину Дмитриевичи).

Так же што мя пожаловал отец твои, князь великий Василеи Дмитриевич, Вяткою, и з слободами, и со всими месты, и вам так же и в Вятку не вступатися, и под моими детми. А мне держати Вятка по отца твоего грамоте, великого князя Василья Дмитриевича.

А дань и ям давати ми тобе с своее вотчины, из Галича с волостьми, по давному, как есмь давал твоему отцю, великому князю. А з Звенигорода и з Звенигородских волостей отложил ми еси дани и яму на четыре годы, опрочь тех волостей Звенигородских, что ся есмь ступил своему брату молодшому, князю Костянтину Дмитриевичю. А уйдут четыре годы, и мне давати дань и ям по старому, как есмь давал отцю твоему, великому князю. А брату моему молодшему, князю Костянтину Дмитриевичю, давати мне дань и ям с Шачебала, и с Ликурги, и с тех волостей Звенигородских, который за ним, как давал при твоем отце, при великом князи. А переменит Бог Орду, не имешь давати татаром, и мне имати с своее вотчины дань и ям собе, а князю Костянтину Дмитриевичю с тех своих волостей имати дань и ям собе, а мне у него не имати.

А коли ти будет всести на конь на своего недруга, и мне с тобою послати свои дети своими бояры и слугами. А будет ти послати мою братью или мои дети, и мне так же послати свои дети з бояры и слугами. А будет ти послати свои воеводы, и мне послати с твоими воеводами своего воеводу своими людми.

А хто имет мою вотчину обидети, и тобе меня боронити.

А хто имет жити ваших бояр и слуг в моей вотчине, и мне их блюсти, как и своих. А хто имет жити моих бояр и слуг в вашей вотчине и в великом княженьи, и вам их блюсти, как и своих. А хто которому князю служит, где бы ни жил, тому с тем князем и ходити. А городная осада, где хто живет, тому туго и седети, опрочь путных бояр.

А князей ми твоих служебных с отчиною себе в службу не приимати. А который имут мне служити, и им в вотчину свою не вступатися.

А што были межи нас в наше нелюбье воины, или грабежи, или дани иманы, или где што взято и положеное, и тому погреб на обе стороне. А хто будет нятцев изниман, или на поруце дан, или к целованью приведен, а тех пустити без окупа, и порука и целованье свести на обе стороне. А што будет у них взято, а то остало. А который твои люди, великого князя, приведены будут у меня к целованью, и с тех ми целованье свести. А кого будете вы моих людии к целованью привели, и вам с тех целованье свести. А што твои наместници, и волостели, и поселскии, и их тивуни ведали мою вотчину и села боярьскии в моей вотчине, и о том нам отослати по боярину, и они о том учинят исправу. Што будет взято право, то остало, а што будет взято криво, а то отдати по исправе. Так же што ведали мои волостели, и поселскии, и их тивуни вотчину княжу Костянтинову Дмитриевича, Шачебал, да Ликургу, а то по тому же отослати по боярину да учинити исправа. Што будет право взято, то остало, а што будет криво взято, от отдати по исправе. А суженое, положеное, заемное, поручное, кабалное по исправе дати. А холопа, робу, должника, поручника, беглеца, татя, розбоиника по исправе выдати.

А на сем на всем, брате старишии, князь великий Василеи Васильевич, целуй ко мне крест, к своему брату молодшому, ко князю к Юрью Дмитриевичи), и с моим братом молодшим, со князем Ондреем Дмитриевичем, и с нашим братом молодшим, со князем Костянтином Дмитриевичем, по любви, в правду, без хитрости.