растет. Уроженцы, творящие доброе, ищут благодать благу. Пришельцы, ищуще зла, не яко злая постигнет их, аще бы стрегли себе от приидущаго зла, но яко Адаму в раи вся тварь покарялася, тако яве и всякому християнину приятии Богу всинепорочнии путем. Корение благочестивых твердостне и не отимутся от них; сеяй правду, приимут мзду верну. Сын праведен раждается в живот, желание праведных всеблаго, неугодно праведну ничто же неправедно и лутче обрести благодать от Господа Бога, служити верно. Творяй же веру, приятен ему есть.

О мирном поставлении. О мирности упражняяся в пример словес в народ владении делнаго розговора, понеж благоухишренну мужу подобает ведати различныя обыкновения и разные сонмов уставы и законы, дабы могл лутши искуство прияти грады, и тверды, и похвалный устав о чинех установити, крест в мире, верность и ангелом радость.

Философие довлеет правду во всех делах хранити, от сего велия любовь межь всеми роды добре живет. И новых вещей не вносити, а пришлецов за рубежь высылати, обаче попечение имети должни есмы, да нашему сибирству во веки пребывати, дабы отчизна наша, когда тогда ныне требует совета и мудрости и подлинным советом здравым, а не спыльчивым что исцелити добрыми обрасцы, которыми мочно междуусобные и градские ухишрения и злобы утишити, ниже сокрушатися. От повестей не искуства смотрети подобает. Ведомо мирное поставление крепце в мире чисте, ини же не согласни, ине стоят крестопреступне, леть лесть в сердци, делаюшем злая; хранящеи мира возвеселятца. Конь познавается в день брани, от Господа же помощь.

О несчастии воинском. Истинная и пригодная мудрость: место дати иногда времени, а нужде всегда пособляти, паче в писание разум прилагати, зане ухищренный мужь не имать противитися нещастию, но парусы свои отпустивше, стояти до времени потребна, дабы возмогл после выправить якори и по той воде надежно плавати, которая прежде необычно волновалася. Хотя нагло, невинне потонет, ибо в разуме противитися ветром противным и зелным бурям и по небу ничего иного не бывает, токмо самовольне заранее в тихость стати и подлинному опасению вдати. Да по сем искусни доволне будем и изберем мудре сущим посредняя, и когда ни есть сызнова в тиски свое учение воинъское справлено буди, да от несоветов наших посторонные не смеялися, паче жь неприятели да не радовалися. И несуменно тщателно, разумно, конечно в совете и в любви пребывати.

Положение святых отец о верных слугах. Во время видевше святии отцы греческую честь в тесноту достигше и пасти хотяще, советующе самодержцем о верном слуге, глаголюще: «Лутче един праведен, нежели 1000 прошаков, и лутче мудре укрепити единем, неже многим неразумством, той бо не лютым оружием посполитым плоти низлагая, но словом от Бога враги вскоре низлагаются и грады и многи тысящи своих спасены содевают». Яко мужь мудр, паче крепкаго мудрость имея и лутше тяжателя велика, с разумом сила, мужество глаголется; крепость душевная мудрость есть, побеждаяй видимыя враги, всячески победит и невидимы. Аще свой дом добре строит, то и все добре устроит. Прилепивыйся с Господем един дух имать. Мудрость укрепляет мудраго паче силных и лутче храбрых, храбръствующе без ума, мудраго дума паче многих рек, и тою просветитца лице его. Сего ради самодержцем мудрствовати подобает или мудрым последовати, похваляюще святии отцы, на них же воистину, яко на престоле, Бог почивает. Мудрость надо всеми добродетелми царствует и паче силных во граде обладает, и в сем царствует.

О храбрости воинской. Еще на подвиги привед, оружия предлежит златая требе есть, взяти сия в руку и действовати ими. Ты хощеши не славне спастися и ничто же благо соделати, рцы ми, аще брань стояла бы и царь был бы ту и овех убо видев, еже в самыя в полки супостат впадших и посекающих и ратная соделовающих тмами, друзих же на особь с собою борющихся. Инех на конех урышущих и похваляемых от царя, чюдимых, соплескуемых, венчаемых, других паки любезно вещь мнящим, аще ничто пострадавших зло и последний чин хранящих и в безмолвии седяших. Таже по скончании брани видим овых убо призывающих и почитающих великими дарми и проповедуемых, онех же ниже имени явленну бывшу. Зри, от коих чина служебник хощеши быти воздаяния? Аще бы и каменносердечен и нечювствен и бездушевных гнуснейше, паче жь ленив не бы вожделел тмами благих бо дарованну быти при очию похвално всенародне воздаяния благая и похвалу в роды, яко не обладают елени лвом, но лвы еленем.

Не влаятися семо и авамо, но царским путем идем. «Суета суетствий, всяческая суета, – глагола мудрец, видех бываемое под солнцем, – и се суета». На рати железо дражайше злата, а при животе нашем паче богатства, и сего ради лепо не уклонятися ни на десну, ни на шую, но царским путем да тецем жително, понеже в житии нашем ничто же стоятелно и ничто же утверженно, но все прелагателно: от утра до вечера день пременяет, горняя бо не суть долу, а долняя горе. И сего ради довлеет ни во благопослушных веселитися, ни в неудобных испадати, паче быть во обоих кротку, ко единому солнцу тщатися. И нерастленное житие присвояет к Богу. Аще велик хощеши быти пред Богом и пред человеки, посему смирися, ино во всем прославишися. Небесная ради красоты, мирские хранится слепоты, понеже с премудростию зиждется храм, с разумом исправляется. Действием исполняются сокровища, от достигшаго богатства всекрасная слава. А неразумным юность и доброту телесную изменяет старость, а печаль – славу, а богатъство разоряет смерть и тля, и всякое веселие века сего с плачем скончается.

Правда же пребывает во веки. Тать ненавидит солнца, а гордый смиреннаго. Мудрый мужь смысленным друг, а несъмысленным враг. Идеже бо свары и рвения, оттоле удаляется Бог. Брате, буди слепым око, хромым нога, алчущим пища, нагим одежда, болным посетитель, от бед свободитель, от всех чести не ищи. И о сем дозде кончаем.

Се дозде доплывше, ветрила словес спустивше, в твердем пристанище истории охотне почием. Никто жь себе тако милует, яко жь всех нас Бог. Ты же, читателю, зря вышеписанное, вспоминай Бога паче дыхания, чти его делом, а хвали его словом и помыслы бойся его. Душу имей аки воеводу, тело аки воина, дабы воин воеводе во всем благопокорен, а не воевода воину, яко ества здравая из глинянаго блюда есть вкусна.

Аз же в Сибирьстей быти о единодушных казацех вкратце глаголал, налично всположих в Тобольске граде всенародному зрению нескрытно, аще и языка светлоречиваго не стяжах, еже железным ключем отверзох, а