быти,

Чаях в землю любезную мне главу скрыти.

Языцы же вси и острови от многия силы произшедши,

Много же богатство от пленов собравшии,

Яже на мериле часом малем разсуждаемо,

Злата различие о камень трыюще искушаемо.

Ниже настоящим печалным подкланятися,

Сице исправится тебе, еже всегда радоватися.

12. Василия Великаго, о еже внимай себе

Яко да советы сердечныя друг другу открываем,

Ради приобщнаго естества кождо искреннему подаваем:

Идеже убо быстро грехопадение,

Скорое даетъся нам хранение;

Елма же сугубо есть, еже внимати,

Убо телесныма очима к видимым взирати,

Всяк же, иже от скверны, студ очищати,

Всякою же от добродетели добротою ту украшати.

Лех кольки стерпимо грехопадение,

Да сравняетъся и покаяние;

Убо тожде и недугующих исцеляет,

Здравствующих совершает,

Твердо основание веры да полагает, —

Зодчий да блюдет, како назидает.

Житие Слово хощет не возлежаща, не спяща,

Но трезве и бодростне себе предстояща.

Не убо настоящее лености ради оставляй,

Яко в руку сущих наслаждение полагай.

Есть комуждо нас много испытовати чюждая:

Премени, рече, дружная, злая <с>облюдовая.

Душу приял еси умну, ею же бога разумеваеши,

Премудрости плод сладчайший обираеши.

Паки похоти лукавыя ти душу раждизают,

Во устремления неудержима блудная влагают.

Еще очима разумение —

Мысленно имей постижение,

Крепко языку опирание подавающе,

Убо ссецающе ту, ови же сотрывающе.

Премудрость сотворшаго тя узриши,

Самого, рещи с пророком, удостоиши.

13. Василия Великого, о утвержении мира

Ово убо бремя много стяжания,

Заеже требующим отложения:

Другов же и обычных отверэаяся.

Не бывай прискорбен, Христови совокупля<я>ся,

Пред очима приводящу и исправляющу,

Схождения к сожителствующим составляющу.

И се есть божий глас и не погрешает:

Страдалческим законом жителствовати подобает.

Да будет ти горко вкушение <...>

В пучине и всяцем ветре, и бури спасшийся.

Внутрь пристанища обезпечалившияся;

Да не приближатся твоя одеяния ко онаго.

Паче же приими старца последняго.

От братолюбива сердца тебе проносимым

Притекай к старцем, неудобь умолимым.

Возможет тя вложити чрево, бесования страсть

Безстудне тя смерти предаст,

При течении их место цвести устраяет,

Изникнет ти в сердце, вся чювства твоя напаяет.

Сиа Адама смерти предаде

И миру потоп наведе.

Даниил — идолом низложитель[358]

И змиеубийце, лвом наказатель,

Вочеловечения Христова прорицатель

И таинством сокровенным сказатель,

Яко тех клеветники сотвориши,

Места страстем мыслию своею удержиши,

Питаяся ради плоти твоея составления

Прежде потребнаго исполнения?

Колми подобает ти паче духовной пищи пребывати

И молитвою свою душу укрепляти.

Безчестие от высокоумия раждается.

Священническим степенем случается.

Бывай подражатель Христов.

А не Анътихристов.

Аще сице начнеши,

Сице же и сконъчаеши

14. Василия Великаго, о посте

Ленивых же и медленых подвигнути <мощно ему на> усердие,

Отнюду же воеводы — на онолчение,

Воины к невидимых враг брани въчиневающу,

Ради воздержания приготовающу.

Масло убо страдалца умащает,

Пост же постника укрепляет.

Они же, иже от железа предлагают,

Нетуюжде обоим крепость сотворяют.

Пьянством утрешнее растлиши воздержание:

Зол есть помысл, лукаво умышление.

Уцеломудряет <пост> юнаго,

Честна творит стараго.

15. Иоанна Златоустаго, в среду сырную [от евангельских указаний]

Ни единаго же от себе возвращает,

Но всем руку простирает.

Аще си вся на уме своем напишеши,

Никакия же муки не приймеши.

Аще ти речет: «постися», — то ты немощ предлагавши.

Или ти речет: «ходи в церков», — то печалей предлагавши.

На небо руце воздети како можеши?

Претерпевый бо до конца спасен будет,

Утрудив<ый>ся не до конца в веки жив не будет.

Сия вся мала суть глаголюще,

Велика же исправляюще.

Скоро позрено быв — велие бывает,

В глубину греховную низводя, оскорбляет.

Несть бо долго время хотящему спастися:

Разбойник бо не в долго время спасеся.

Не видиши ли что сии творят:

Отцы их огнь гнетят,

А сынове их дрова собирают

И жены их, ловливают,

Сия вся помысляюще

И будущая благая часто поминающе.

16. Инока Анастасия[359], о 6-м псалме

Кающихся воистинну неложно смирение,

Исповедание, слезы, плач, обращение,

Стонание, совестное терзание,

Болезнь неизреченных согрешений сокрушение,

Еже от милости божии, спасение,

Всенощъное к богу прилежание.

Множицею в церкви к тебе припадая,

Абие исходя — в беззаконие въпадая,

Сего ради, господи, доколе не помилуеши?

Доколе не отмщавши и не призиравши,

Аще убо достоин есмь всякаго оставления?

К молению паче к богу прелож помышления.

В них же ни едину надежду спасения имущих,

В саму ту глубину ада согрешений приспевших;

На крадбы некия и татбы того растливше,

Разбойником началника того рукоположивше,

Где есть отрок, да ведет мя и прочее, яко же имяше,

На конь въсед, неудержиме женяше,

И постиг горы, идеже разбой бяше,

Неудержиме отрока, глаголя, женяше.

Напрасне восхищаются, ни проглаголати, ни прослезити,

Ни завет могуще сотворити.

17. Василия Великаго, в пяток сырный [о посте]

Нам же всякоя трубы велегласнейше

И всякоя цевницы благознаменнейше,

Иудейский убо поста нрав отринувшу,

Истинный же нам пост показавшу,

Да причастник будеши Христу.

И тако приступи к посту.

Притворенни образом — внешнее помрачается,

Яко же под завесой, лжею покрываемо, погубляется —

Телеса, частостию убо сытостию отягчаваема,

Удоб в болезнех бывают погружаема.

Пост пророки раждает,

Сильныя укрепляет,

Законоположники упремудряет.

Той и искушения отражает.

Той трезвению сожитель,

Целомудрию содетель.

Назорея освящает,

Священника совершает.

Како же ли и