Список времени около 1560 г.

Полное собрание русских летописей. Т. XXX. Владимирский летописец. Новгородская вторая (Архивская) летопись. М., 2009. С. 85.

(Владимирский летописец)

«В лѣто 6731. […] Того же лѣта бысть всѣмъ княземъ Руским бои на рецѣ на Калкѣ с Половци; Олександра Поповича убиша, иных багатыреи многыхъ, и Киевъ взяша. Си злоба стася мѣсяца маия 30».

Список XVI в.

Полное собрание русских летописей. Т. XXXIV. Постниковский, Пискаревский, Московский и Бельский летописцы. М., 1978. С. 83. (Пискаревский летописец)

[В составе летописи дошла только первая часть повести о битве на Калке]

[С. 83] «О поб[о]ище, иже на Калках. В лето 6731 по грехом нашим приидоша языцы незнаемы при великом князе киевском Мстиславе Романовиче, внуце Ростиславле Мстиславича. Приидоша бо неслышании безбожни моявитяне, рекоми татаровя, их же добре ясно ничто же съвесть, кто суть и откуду приидоша, и что язык ихь, и которого племени суть, и что вера их; зовут же я татарове, а ини глаголют таурмени, а други — печенези, инии глаголют, яко си суть, о них же Мефодий, епископ паторомский, сведетельствует, яко вси суть вышли ис пустыня Етривския, сущи межди востоком и севером, по скончанию времени явитися им; их же загна Гедеон; и попленят всю землю от востока и до Ефрата и от Тигр до Понтъскаго моря, кроме Ефиопия. При сих же слышахом, яко многи страны поплениша: Ясы, Обезы и Косаги. Приидоша же на землю Половецкую, и половцем ставшим, а Юрьи Кончакович болии всех половец не може стати противу лицу их, но бегающи ему; а половцы не може противитися им, побегоша, и мнози избиении быша; и гониша их до реки Днепра, а иных загониша по Дону и в лукомория, и тамо изомроша, убиваеми гневом божиим и пресвятыя его матере, много бо ти половцы зла сотвориша Руской земле. Богь же отмщение сотвори над безбожными куманы, сыны Измайловы, победиша их татари, инехь язык 7, проидоша землю Куманскую и придоша близ Руси. А Котяк, половецкий князь, со инеми князи и со останком половец прибегоша, иде же зоветца вал Половецкий. А Данил Кобякович и Юрьи Кончакович убиена быста. А иных мнози половцы прибегоша в Рускую землю. Сей же Котяк бысть тесть князю Мстиславу Мстиславичю галическому. И прииде с поклоном со князи половецкими къ зятю князю Мстиславу в Галич и ко всем князем руским, и дары принесе умноги: кони и велблюды, буйволы и девки. И одари всех князей русских, глаголаше к ним сице: „Нашю землю днесь отъяли татаровя, а вашу заутро возьмут, пришедше; то пообороните; аще ли не поможете нам, то мы ныне изсечени будем, а вы наутри изсечени будете“. И нача молитися къ зятю своему о пособии. Мстислав нача молитися братием своим князем руским, река: „Аще мы, братие, сим не поможем, то предадятся им же, то больши будет сила их“. И тако думавше много, яшася пособити Котяку, слушающе же моления половецких князей.

Бывшу жъ совету всехь князей, и во граде Киеве сотвориша сице совет: „Лутше бо нам сретити их на чюжей земле, нежели на своей“. И начаша вои строити киждо свою власть. Тогда бе в Киеве князь Мстислав, сын Романов Ростиславича, а в Чернигове Мстислав Святославич козельский, а в Галиче Мстислав Мстиславич; тии бо беяху старейшии в Руской земле, с ними же князи млады: князь Данило Романов сын Мстиславича, князь Михайло Всеволодичь черниговский, внук Святославль Ольговича, князь Всеволод, сын Мстислава киевскаго, и ины князи многи. Тогда князь великий половецкий крестися Бастый. И совокупиша землю Рускую всю противу татаром. И приидоша к реце Днепру на ко острову Вяряжскому. Уведаша же татарове, яко идут князи рустии противу им, и послаша послы ко князем руским, рекуще: „Се слышахом, оже противу нас идете, послушавше половец; а мы вашей земли не яхом, ни градов, ни сел и не на вас приидохом, богом попушеннии на холопи ваши и на конюхи сво[и] на поганые половцы; а вы возьмите с нами мир; аще побежит к вам половеци, и вы их бейте, а товар себе емлите; слышахом, яко и вам зло творят“. Князи же тово не послушаше и послы побиша, а сами идоша противу им. И прислашя татарове другия послы, глаголя: „Идете противу нам, послы наши избили, а мы вас не замали“. И отпустиша послов их. Опять прииде же к руским князем Половецкая земля, а ис Киева князь Мъстислав со всею силою, а Владимер Рюрикович с смольняны, и вси князи рустии. И тогда князь Мстислав галический перебродеся Днепр в тысещи вои на сторожи татарския и победи я, а останок их побеже с воеводою с Гемябеком. И ту им не бе помощи, и погребошя воеводу своево Гемябека жива в землю».

Список первой половины XVII в.

Полное собрание русских летописей. Т. XVIII. Симеоновская летопись. М., 2007. С. 52

[В составе летописи дошел только конец повести о битве на Калке]

«В лѣта 6732 […][С. 52] То же слышавъ Василко приключившшеся въ Руси, възвратися отъ Чернигова, съхраненъ бысть Богомъ и силою креста честнаго и молитвою отца своего Костянтина и стрыя своего Юрья и вниде въ свои Ростовъ, славя Бога и святую Богородицю».

Список первой половины 40-х гг. XVI в.

Полное собрание русских летописей. Т. XL. Густынская летопись. СПб., 2003. С. 115–116

[С. 115] «В лето 6732. 1224. Прийде погибель на Половцов, якоже они доселѣ окрестныхъ народовъ плѣняху и губяху, нынѣ же ихъ погибель наста. Прийде бо въ сия наша страны нѣкий ядовитый, варварский народъ, въ нашой странѣ неслыханый, глаголемый Татаре, о нихъ же от коего роду суть и откуду прийдоша нѣчто речеся вышше, ихъ же Половци, неспокойни суще, на свое зло и свою погибель, пакости имъ дѣюще, раздражиша. Татаре же, въ безчисленномъ множествѣ пришедше, Половцов не токмо побѣдиша, но даже и до основания искорениша, а на их зем[л]ѣ сами сѣдоша. Отнюду же и потом начаху и на нашу Рускую землю, и на Лядзкую, и Угорскую приходити плѣняюще, яко же о том будетъ нижей.

В сие лѣто Половци, побѣждены бывше от Татаръ, прибѣгоша ко рускимъ княземъ со великими дары, найпаче же старейшый князь половецкий Копяк прибѣже ко Мстиславу Галицкому, зятю своему, и ко прочиим княземъ, моляще их, да помогут имъ противу безбожных Татаръ. И глаголаху: „Аще ли нам не поможете, то Татаре ныне нас изъсѣкутъ, а утро васъ“. Тогда же крестися и Бастый, великий князь Половецкий. Собрашася же ся въсѣ