Omnes episcopi dixerunt: Anathema habeatur qui Christum Filium Dei Dominum uerum non dixerit.

22. Item adiecit: «Solum uerum, solum immortalitatem habentem.»

Ambrosius episcopus dixit: Filius Dei habet immortalitatem aut non habet secundum diuinitatem?

Palladius dixit: Apostolum admittis aut non? Rex regnum, qui solus habet immortalitatem (I Tim. 6:15–16).

Ambrosius episcopus dixit: De Christo Filio Dei quid dicis?

Palladius dixit: Christus nomen diuinum est aut humanum?

23. Eusebius episcopus dixit: Secumdum carnis quidem sacramentum Christus dicitur, sed idem Deus et homo est.

Palladius dixit: Christus nomen carnis est? Christus nomen humanum est? Et respondete uos mihi.

Eusebius episcopus dixit: Quid superfluis immoraris? Cum legeretur impietas Arri, qui hoc dicit de Patre quia solus habet immortalitatem, attulisti testimonium ad consensum impietatis Arri, ex Apostolo dicens: Qui solus habet immortalitalem et lucem habitat inaccessibilem (I Tim. 6:16). Sed si intelligis, totius naturae dignitatem in Dei nomen expressit, siquidem in Dei nomine et Pater et Filius designatur.

Palladius dixit: Et ego uos quod interrogaui respondere noluistis.

24. Ambrosius episcopus dixit: Aperte de te sententiam quaero. Filius Dei habet immortalitatem secundum generationem diuinam an non habet?

Palladius dixit: Secundum generationem diuinam incorruptibilis est, per carnem mortuus est.

Ambrosius episcopus dixit: Non diuinitas mortua est, sed caro mortua est.

Palladius dixit: Ante uos mihi respondete. Ambrosius episcopus dixit: Filius Dei secundum diuinitatem habet immortalitatem an non habet? Sed etiam fraudes et insidias tuas non secundum Arri professionem prodidisti? – Et adiecit: Qui Filium Dei negat habere immortalitatem, quid uobis uidetur?

Omnes episcopi dixerunt: Anathema habeatur.

25. Palladius dixit: Status diuinus immortalis est.

Ambrosius episcopus dixit: Astute et hoc, ut de Dei Filio nihil exprimas euidenter. Et ego dico: immortalitatem habet Dei Filius secundum diuinitatem. Aut nega quia habet immortalitatem.

Palladius dixit: Christus mortuus est aut non? Ambrosius episcopus dixit: Secundum carnem. Anima nostra non moritur; scriptum est enim: Nolite timere eos qui carnem possunt occidere, animam autem non possunt (Matth. 10:28). Cum igitur anima nostra mori non possit, putas quod Christus secundum diuinitatem mortuus sit?

Palladius dixit: Mortis appellationem quare tu horres?

Ambrosius episcopus dixit: Immo non horreo, sed confiteor secundum carnem meam. Est enim per quam a mortis uinculis sum reuinctus.

Palladius dixit: Mortem separatio facit spiritus. Nam Christus Filius Dei carnem suscepit et per carnem mortuus est.

Ambrosius episcopus dixit: Scriptum est Christum passum (I. Petr. 2:21). Secundum carnem igitur passus est, secundum diuinitatem habet immortalitatem. Hoc qui negat diabolus est.

Palladius dixit: Ego Arrium non noui.

26. Ambrosius episcopus dixit: Ergo male dixit Arrius, cum etiam Filius Dei habet immortalitatem secundum diuinitatem? – Et adiecit: Bene dixit an male?

Palladius dixit: Non consentio.

Ambrosius episcopus dixit: Cui non consentis? Anathema illi qui non explicat fidei libertatem.

Omnes episcopi dixerunt: Anathema.

Palladius dixit: Dicite quod uultis, eius est diuinitas immortalis.

Ambrosius episcopus dixit: Cuius, Patris an et Fili? – Et adiecit: Multas impietates congessit Arrius, ad alia transeamus.

27. Et recitatum est: «Solum sapientem».

Palladius dixit: Pater a se sapit, Filius autem sapiens non est.

Ambrosius episcopus dixit: Ergo Filius non est sapiens, cum sit ipse sapientia? Nam et nos dicimus quia ex Patre natus est Filius.

Eusebius episcopus dixit: Est aliquid tam impium, tam profanum, quam sapientem Filium Dei negare?

Palladius dixit: Sapientia dicitur; qui potest sapientiam denegare?

Ambrosius episcopus dixit: Sapiens est an non?

Palladius dixit: Sapientia est.

Ambrosius episcopus dixit: Sapiens ergo, cum sit sapientia?

Palladius dixit: Secundum Scripturas uobis respondemus.

Ambrosius episcopus dixit: Etiam sapientem, quantum uideo, Filium Dei Palladius negare conatus est.

Eusebius episcopus dixit: Qui negat Dei Filium sapientem anathema sit.

Omnes episcopi dixerunt: Anathema.

28. Eusebius episcopus dixit: Etiam Secundianus ad hoc respondeat.

Cumque Secundianus reticeret, Ambrosius episcopus dixit: Qui tacet integrum uult habere iudicium. – Et adiecit: Solum Patrem bonum cum dicit, Filium confessus est an negauit?

Palladius dixit: Legimus: Ego sum pastor bonus (In. 10:11), et nos negamus? Quis non dicat bonum Dei Filium?

Ambrosius episcopus dixit: Ergo bonus est Christus?

Palladius dixit: Bonus.

Ambrosius episcopus dixit: Male ergo Arrius de solo Patre dixit, cum etiam Filius Dei Deus bonus sit?

Palladius dixit: Qui bonum non dicit Christum male dicit.

29. Eusebius episcopus dixit: Christum Deum bonum confiteris? Nam et ego bonus sum; mihi dixit: Euge bone serue (Matth. 25:21), et: Homo bonus profert de thesauro suo bona (Lc. 6:45).

Palladius dixit: Iam dixi, non uobis respondeo usque ad plenum concilium.

Ambrosius episcopus dixit: Iudaei dicebant: Bonus est (In. 7:12), et Arrius negat quia Filius Dei bonus est.

Palladius dixit: Qui potest hoc negare?

Eusebius episcopus dixit: Bonus est ergo Deus Filius Dei?

Palladius dixit: Bonus Pater bonum Filium genuit.

30. Ambrosius episcopus dixit: Et nos bonos genuit, sed non secundum diuinitatem. Deum bonum Dei Filium dicis? Palladius dixit: Filius Dei bonus est.

Ambrosius episcopus dixit: Vides ergo quia Christum bonum Filium, non bonum Deum dicis, quod a te quaeritur. – Et adiecit: Bonum Deum Filium Dei qui non confitetur anathema.

Omnes episcopi dixerunt: Anathema.

31. Item recitauit: «Solum potentem».

Ambrosius episcopus dixit: Potens est Filius Dei an non?

Palladius dixit: Qui omnia fecit non est potens? Qui omnia fecit minus potest?

Ambrosius episcopus dixit: Ergo Arrius male dixit? – Et adiecit: Vel in hoc damnas Arrium?

Palladius dixit: Vnde scio qui sit? Ego pro me respondeo tibi.

Ambrosius episcopus dixit: Filius Dei Dominus potens est?

Palladius dixit: Potens.

Ambrosius episcopus dixit: Deus bonus est?

Palladius dixit: Iam dixi Filium Dei unigenitum esse potentem.

Ambrosius episcopus dixit: Dominum potentem?

Palladius dixit: Filium Dei potentem.

32. Ambrosius episcopus dixit: Potentes etiam homines sunt. Scriptum est: Quid gloriaris in malitia, qui potens es iniquitate (Ps. 51:3), et alibi: Cum infirmor, tunc potens sum (II Cor. 12:10). Illud a te requiro ut confitearis Dominum potentem esse Dei Filium Christum, aut si negas, astrue. Nam qui unam potentiam dico Patris et Fili, sic Filium Dei dico potentem sicut et Patrem. Dubitas ergo confiteri potentem esse Dominum Dei Filium?

Palladius dixit: Iam dixi, secundum disputationem prout possumus respondemus uobis. Vos enim soli uultis esse iudices, uos litigatores esse uultis. Non uobis respondemus nunc, sed in concilio generali et pleno respondemus uobis.

Ambrosius episcopus dixit: Anathema illi qui negat Dominum potentem Christum.

Omnes episcopi dixerunt: Anathema.